Nag-istorya sanday South Korean Acting President Han Duck-Soo kag US President Joe Biden sa isa ka phone call matapos ang pag-impeach sang Korean lawmakers kay President Yoon Suk Yeol.
Diri, gin-reassure ni Acting President Han ang mga kaalyado nga pungsod kalakip na ang Amerika kag gintestingan nga ma-stabilize ang financial markets matapos nga maipasa ang impeachment motion batuk sa presidente sang SoKor.
Gintawag naman ni Biden ang alyansa sini sa South Korea bilang “linchpin for peace” sa rehiyon.
Sa isa ka statement naman, ginpahayag ni Acting Pres. Han nga ginpairal sang ila pungsod ang foreign kag security policies sini nga wala sang pagka-delay kag pagatinguhaan sang mga ini nga mapabilin ang alyansa sa tunga sang SoKor kag Amerika.
Si Han ang temporaryo nga nagtal-us kay Pres. Yoon samtang nakabinbin pa ang desisyon sang Constitutional Court sa impeachment sang presidente.
Nangin acting president si Han sa bisa sang decree sang konstitusyon sang Seoul.
Samtang, para naman ma-stabilize ang ekonomiya kag liderato sang South Korea, gin-anunsiyo sang nagapanguna nga opposition party nga indi nila pag-i-impeach si Han sa pagkaulamid sini sa martial law declaration ni Yoon sang Disyembre 3.
