Ginanunsyo sang mga awtoridad sang South Korea nga tanan nga hulugpaan sa pungsod, kinahanglan nga mag-install sang bird detection cameras kag radars bilang sabat matapos ang Jeju Air Crush nga nagpatay sang 179 nga mga indibidwal.
Matandaan nga ang Boeing 737-800, ang nagikan sa Thailand kag padulong kuntani sa Muan airport nabagatnan-nakatungdan nga bahin sang South Korea nga nagtibusok sadtong Disyembre 29 sadtong tinalikdan nga tuig matapos nagderitso sa runway kag nagbunggo sa pader kabangdanan sang paglupok sini.
Bilang sabat sa makasaysayan nga trahedya sang pungsod, naglunsyar ang gobyerno sang South Korea sang isa ka tikang agud mapabilin ang kaluwasan sang mga biyahero kag ginsiguro ang tanan nga hulugpaan mag-angkon sang indi magnubo sa isa ka thermal imaging camera bilang kabahin sang igapatigayon nga inspeksyon kadungan sang maid-id nga pagtuon sa mga pasilidad nga masami suno diri ginakadtuan sang mga pispis.
Kaangut sini, luyag man sang gobyerno sang South Korea nga mag-angkon sang mga mobile sonic devices agud matumod ang kadakuon sang pispis samtang ang mga bird detection radars ipahamtang naman sa tanan nga hulugpaan.
Suno sa mga awtoridad magapagkit ang nasambit nga radars sang sukat kag hulag sang mga pispis kag ipadala ang impormasyon sa mga air traffic controllers nga siya naman ang makig-angut sa mga piloto agud matumod kag gilayon nga maresolba ang problema.
Samtang, natumod sang mga otoridad ang rason sang insidente kung sa diin matapos nakit-an ang mga balahibo sang pispis sa parehas nga makina sang Jeju Air flight.
