ROXAS CITY – Patay ang 12-anyos na solterito matapos makuryente sang live wire sa Sitio Binalabag, Barangay Sibaguan, Roxas City.
Ginkilala ang biktima kay alyas Mike, Grade 7 student sang Capiz National High School.
Ginpahayag ni Micheal Buhe, amay sang biktima nga nagpanikop sa punong ang iya anak kaupod ang iban nga mga utod kag pakaisa kag magapauli na kuntani sa ila balay apang aksidente nga nasandaran ang naglaylay nga linya sang Capelco.
Gindala pa sa ospital ang biktima para ma-revive apang ginbawian sang kabuhi.
Nangin emosyunal ang tanan nga miyembro sang pamilya sang biktima sa nadangatan sang solterito.
Ginabasol naman sang himata sang biktima ang madugay nga pagresponde sang Capelco sang ila ginreport ang pagkabugto sang kuryente sa lugar.
