ROXAS CITY – Tuman ang paghinulsol sang 14-anyos nga solterito sa paglabo sa iya pakaduha nga gintuyo sini himuslan sa isa ka banwa sa Capiz.
Suno kay Alyas Toto nga nagapangayo ini sang patawad kay Alyas Inday kag sa pamilya sini bangud wala niya makontrol ang nabatyagan kag gintuyo sini nga himuslan ang pakaduha.
Gin-ako sa Bombo Radyo sang Grade 9 student nga wala sini napunggan ang init nga nabatyagan sang makita ang legs sang pakaduha rason nga hinali nga nagsulod sa iya nga pinsar nga himuslan ini.
Apang nahimo sini nga lab-on si alyas Inday bangud ginkulbaan ini sang hinali nga magsinggit kag magpangayo sang bulig ang pakaduha gani sa kahadluk nga mahibaluan ang iya ginhimo, ginhatuk hatuk sini labo ang dalagita.
Samtang nakapauli pa sa ila balay ang biktima sa pihak sang naangkon nga pilas sa ulo, kamot kag lawas, sa diin antes ini nalipong, nakasugid pa sa iya pamilya ang biktima sang ginhimo ni alyas Toto.
Wala naman makabutig ang suspek sang padulungan sa ila balay sang mga pulis, sa diin ginhatag sini ang binangon nga gingamit kalakip ang bayo nga may dugo.
