ROXAS CITY – Patay ang isa ka soltero matapos ginbuno sang iya amay nga ginhangkat sini sang away sa Barangay Binuntucan, Pontevedra, Capiz.
Ginkilala ang biktima nga si Sonny Boy Demo, 21 anyos samtang ang suspek nga amay sini amo si Nestor Demo, 59 anyos.
Base sa inisyal nga imbestigasyon, hubog nga nagpauli ang biktima nga may bitbit nga kahoy kag ginhangkat sang away ang iya amay nga nagapahuway na.
Wala pa ginsapak sang amay ang anak sini apang sa iya kakibot, ginlampusan siya sini sang bitbit nga kahoy sa ulo kag iban pa nga parte sang lawas.
Bangud man sa kaakig, nagkuha sang kutsilyo ang amay kag ginbuno ang anak sini nga nag-angkon sang mga patal nga pilas sa dughan kag sa tiil.
Gindala pa sa ospital ang biktima apang gindeklarar ini nga dead on arrival.
Gilayon naman nga gin-aresto sang mga pulis ang suspek nga amay matapos mabulong sa ospital ang naangkon sini nga mga pilas.
