Nagdeklarar sang state of emergency ang gobyerno sang Sri Lanka matapos ang makahalalit nga baha kag mudslides tuga sang Cyclone Ditwah nga nagpatay sang masobra 330 ka mga tawo.
Ginakabig man ini nga isa sa pinakamakahalalit nga bagyo nga nag-igo sa pungsod sang nagligad nga mga tinuig.
Kapin sa 200 ka tawo ang padayon nga missing samtang 200,000 ka mga puluy-an ang nahalitan, kag 108,000 naman ka mga indibidwal ang nagpa-displace sa mga temporaryo nga puluy-an nga ginapadalagan sang estado.
Suno sa mga opisyal, one-third sang pungsod ang wala sang suplay sang kuryente kag tubig.
Nagpatigayon naman sang mga evacuations sa pila ka mga lugar bangud madasig nga naga-awas ang tubig gikan sa Kelani River
Suno sa isa ka residente gikan sa central Sri Lanka, ginabanta 15 ka mga balay sa ila lugar ang nalubong sa idalom sang dalagko nga mga bato kag lunang kag wala sang may nakaluwas sa mga residente.
Ginreport naman ang pinakamadamo nga napatay sa Kandy kag Badulla, sa diin madamo nga mga lugar ang indi pa ma-access.
Bilang sabat, ang gobyerno sang Sri Lanka nag-apelar para sa internasyonal nga bulig kag gin-engganyo ang mga taga-Sri Lanka sa luwas sang pungsod nga magdonate sang kuwarta sa pagsuporta sa mga apektado nga komunidad.
