ROXAS CITY – May mga gindihon nga programa ang Social Security System (SSS) sa ila nga mga miyembro nga naapektuhan sang coronavirus disease (COVID-19) pandemic.
Ini ang ginpahayag ni Amiel Genova, ang Senior Communications Analyst sang SSS sang mainterview sang Bombo Radyo.
Suno kay Amiel Genova, kalakip sa inisyatibo sang ila talatapan kadungan sang COVID-19 pandemic amo ang paghatag sang sickness benefits.
Ginpahayag sini nga bisan sin-o nga miyembro sang SSS ang kwalipikado para sa amo nga benepisyo sa baylo nga makahatag ini sang medical certificate nga kapin sa apat ka adlaw ini nga ginmasakit.
Bangud man sang COVID-19 pandemic, ginpalawig pa sang talatapan sa 60 diyas ang plaso sa pagpasa sang sickness notification nga luyag maka-avail sang sickness benefit.
Nakadepende naman suno diri ang kantidad sang sickness benefit sa monthly salary credit sang isa ka aplikante.
Sandig naman sa Republic Act 11199, may yara man sang unemployment benefits para sa mga nadulaan sang trabaho bangud sang COVID-19 pandemic.
Ginahulat naman sang talatapan ang approval sang guidelines para sa pag-release sang calamity assistance kag calamity loan application.
