ROXAS CITY -Dismayado ang stall owners sang duha ka mga stalls sa Teodoro Arcenas Trade Center (TATC) matapos ginkawatan ang ila balaligyaan sang wala pa mahibaluan nga mga kawatan.
Ginpahayag ni Nay Perla Abaña, tag-iya sang isa ka stall nga sa 30 ka tuig sini nga pagbaligya sa merkado publiko subong pa lamang ini nabiktima sang kawatan.
Kalakip sa nataban sang suspek ang mga bayo panglalaki, brief, toothpaste, kape, wallet, habon kag mga sensilyo sa kahon nga ginbilin sa stall.
Ba-se sa panaysayon sang ginang nga temprano pa ini nagsarado sang balaligyaan kag nagpauli bangud gin-shorten ang market hours bangud sa COVID-19.
Apang ginkakibot sini sa pagbalik sa merkado kag nakita nga bukas ang naibabaw nga bahin sang stall nga ginapatihan gin-agyan sang kawatan.
Nahibaluan nga ginguba sang suspek ang cyclone wire para lamang makasulod kag makapangawat.
Samtang nagpasiguro naman ang head security sang TATC nga pagahugton nila ang monitoring agud indi na masulit ang insedente.
Suno kay Efren Diaz nagpatigayon na sila sang imbestigasyon agud matumod kun sin-o ang suspek nga nagsulod kag nagpangawat sa duha ka mga stalls.
Apang posible nga bata ang suspek bangud gamay ang buho nga gin-agyan.
Nagpanugyan man ini sa mga tag-iya sang stalls nga indi magbilin sang mga sensilyo, agud wala sang kuhaon ang mga kawatan.
Nahibaluan nga may CCTV sa amo nga area apang dimalas nga wala nagafunction.
