Napasakaan na sang kaso ang subject person sa ginpatigayon nga drug buybust operation sang mga katapo sang Tapaz Municipal Police Station sa Barangay San Julian, Tapaz, Capiz.
Ginkilala ang subject person kay alyas “Tawing”, nagapang-edaron sang 35-anyos, isa ka security guard kag residente sang Barangay San Nicolas sa amu nga banwa.
Suno kay PCPT. Joebert De Los Reyes, Hepe sang Tapaz Municipal Police Station, ginpahayag nga naglab-ot sa isa ka bulan ang monitoring nila sa amu nga subject person kag natigayon nga nadakpan pinaagi sa isa ka pulis nga nagpakuno-kuno nga poser-buyer.
Madumduman nga nakuha sa posesyon sini ang apat (4) tanan ka sachets sang suspected shabu nga may kabug-aton nga 2 grams kag may standard drug price nga P13,600.00.
Magluwas diri, narekober man ang balor P1,100.00 nga buybust money, isa ka yunit sang cellphone kag isa yunit sang motorsiklo.
Mahibaluan nga nagapangatubang ini sa kaso nga paglapas sa Republic Act 9165 ukon “Comprehensive Dangerous Drugs Act of 2002.”
Samtang, nagpositibo naman sa drug test ang amu nga subject person.
Sa karon, nagapabilin sa kustodiya sang Tapaz Municipal Police Station ang amu nga persona kalakip na ang mga kagamitan nga narekober sa posesyon sini para sa nagakaigo nga disposisyon.
