ROXAS CITY – Ginkumpirmar sang pamunuan sang Department of Trade and Industry (DTI-Capiz) nga nagakaubosan na sang suplay sang alcohol sa pila ka mga malls, department stores, supermarkets, botika kag iban pa nga mga establisyemento komersiyal bangud sa padayon nga pagsaka sang numero sang nagapositibo sa Coronavirus Disease (COVID-19).
Ini ang ginpahayag ni DTI Capiz Provincial Director Ken Queenie Cuñada sang ma-interview sang Bombo Radyo Roxas.
Suno kay Cuñada nga wala na sang mabakal nga mga alcohol bangud sa mataas ang demand kag manubo naman ang suplay sang mga manufacturer.
Ginpanugyanan ni Cuñada nga indi magkabalaka ang mga pumuluyo bangud nagpadala na sila sang mandu sa mga local manufacturer sang alcohol nga kun mahimo doblehon ang pagproduce sini.
Gindugang pa sini nga indi dapat magpanic sa pagbakal sang alcohol kag kun mahimo nga magbakal sang isa tubtob sa duha lamang ka botely agud may yara man sang magamit ang tanan.
Nagpaandam naman si Cuñada sa mga online sellers nga nagbakal sang madamo nga alcohol kag ginabaligya sa online sang double ang presyo nga kun ila nga madakpan sarang nga magapangatubang ang mga ini sang nagakaigo nga panumbungon.
Lauman naman nga wala sang pagsaka sa presyo sang alcohol bangud sumugod sang Marso 11 sini nga tuig may yara na sang price freeze sa mga hospital needs.
