ROXAS CITY – Bastante ang suplay sang asin partikular sang iodize salt sa mga supermarket kag grocery store sa syudad sang Roxas, apang may paghulag sa Suggested Retail Price (SRP) sini.
Ini ang ginpahayag ni Ms. Juvy Benliro, OIC Division Chief sang DTI-Capiz sang mainterview sang Bombo Radyo.
Suno diri, kadungan ang pagtaas sang asin sa iban pa nga lakip sa “basic goods and prime commodities” nga ginpataasan subong nga tuig 2022.
Ginpanginwala sini nga may kakulangan sa asin kabaliskaran sa nagalapta sa social media.
Dugang pa ni Benliro nga nagahulat nalang sila sang mandu gikan sa nasyunal nga ilakip sa ila nasakupan sa pagmonitor ang mga presyo sang asin sa merkado publiko.
Mahibaluan 2-10% ang pagtaas sang asin sa mga supermarket kag grocery store kun sa diin ang iodize salt mabakal sa P29 samtang ang iodize wrap salt naman mabakal sa P21.75-23 kada kilo.
Ginsiling ni Benliro nga nagpaidalom sa maid-id nga pagtuon kag gintsekyar ang production cost antes ginpasugtan kag ginpaguwa ang SRP.
Obligado naman ang mga wholesaler kag retailer nga magsunod sa nasambit nga SRP.
