ROXAS CITY – Wala na sang suplay sang balas kag bato ang pila ka mga negosyante sa syudad sang Roxas.
Sa interview sang Bombo Radyo kay Janile Pelaez, gravel and sand owner sa bahin sang Arnaldo Blvd. Roxas City, suno diri sumugod ginpasuspinde sang gobernador ang quarry operation wala na sila makuwaan sang suplay kun sa diin isa sa ila ginakuwaan yara sa banwa sang Panit-an nga sa karon sarado na.
Mabudlay ini para sa iya bangud ginapasweldo niya ang iya mga trabahador adlaw-adlaw kag indi man niya mapahalin bangud sa kaluoy nga may mga pamilya pa nga ginabuhi.
Bilang solusyon, nagabiyahe na lamang ang iya bana padulong sa probinsya sang Aklan agud magbakal sang “selected stock” kun sa diin nagalab-ot sa P2,500 ang magastos sa kurodo.
Suno diri, P800/ cubic meter sadto ang ila baligya apang subong P1,000 na bangud man sa dako ang ila nagastos agud makakuha lang sini kag iban pa nga balayaran.
Panugyan sini nga kuntani mabalik na ang ila pangabuy-anan bangud tuman na sila nga nabudlayan.
