ROXAS CITY – Sa ginpatigayon nga sesyon subong nga adlaw sang Sangguniang Panlungsod, gin-aprubahan na ang supplemental budget nga gin-apropar sang city government para sa subong nga tuig 2022.
Kapin P230,409,805 ang kantidad sang nasambit nga pondo nga magakadto sa mga proyekto kag programa sang gobyerno syudad kapareho sang general fund, general fund proper, 20% development fund, gender and development fund kag operation of market and local disaster risk and reduction fund.
Gin-alokaran man sang kapin P31 milyon gikan sa pondo ang pagpakay-o sang Teodoro Arcenas Trade Center (TATC) nga tubtob sa karon padayon nga ginakay-o.
Samtang, para sa rehabilitasyon sang People’s Park sa bahin sang Barangay Baybay, may pondo ini nga nagalab-ot sa kapin P12,327,285.
Sa bahin sang DRRM fund may yara ini sang alokasyon nga nagabalor sa kapin P20,109,876.
Para sa seguridad, ginapahayag ginpondohan ang igapahamtang nga masobra sa 100 ka CCTV sa bug-os nga syudad sang Roxas kalakip ang Barangay Baybay, TATC kag Libas Fishing Port.
