ROXAS CITY – Ginklaro sang tagdumalahan sang City Engineer’s Office nga ang karsada nga ginareklamo sang mga residente sa Purok 3, Brgy. Libas lapus sa Sitio Tabay, Brgy. Barra. sini nga syudad, ang proyekto pa sang nagligad nga administrasyon.
Ini ang ginpahayag ni Engr. Noel Laminares, sang mainterview sang Bombo Radyo.
Suno diri nga sa iya ihibalo, may pondo na ang nasambit nga proyekto kun sa diin natigayon naman nga mabayaran ang supplier sang materyales nga nakapangalan sa Solidus, apang indi na ini makita sa karon.
Nahibaluan nga 73 metros pa ang nabilin nga inug-semento, base man sa iya pag-survey sang tinalikdan nga adlaw sang Huwebes.
Ginsiling man ni Laminares, nga ginpalab-ot sini sa talatapan ni Mayor Ronnie Dadivas, rason nga ginpainan na ini sang pondo sang subong nga administrasyon sa ila 2022 budget, gani posible nga sa 1st quarter sa masunod nga tuig pa ini ma-reconstruct.
Naintindihan man sini ang perwisyo nga ginatuga sa mga pumuluyo sa lugar, rason nga naka-schedule na ang pagpatambak sang boga sa dalan, apang bangud masami nagaulan, wala pa ini masuguran.
Ginpromisa sini nga kun magmaayo ang tyempo, paga-unahon sini nga mapatambakan sang boga ang amu nga karsada.// Matandaan nga ginreklamo sang mga residente ang dalanon nga naga-konekta sa kaiping nga Barangay bangud sa tuman kaligna kag indi na makalabay ang mga magagmay nga salakyan sa lugar.
