CAPIZ – Padayon nga naga-stabilize ang supply sang dugo sa probinsya sang Capiz suno sa pamunuan sang Philippine Red Cross–Capiz Chapter.
Sa interview sang Bombo Radyo kay Mr. Raymundo Martinez, Administrator sang Philipine Red Cross-Capiz Chapter, iya ginpahayag nga humalin bulan sang Disyembre 2025 tubtob Enero subong nga tuig, may pagnubo sa supply sang dugo bangud yara sa 50 tubtob 70 units sang dugo sa kada adlaw ang gina-dispense sa blood bank.
Suno kay Martinez, apisar wala nagasaka ang demand sang dugo, nagakulang naman ang mga indibidwal nga nagadonate.
Pahayag pa niya, tanan nga blood type importante bangud lunsay ginakinahanglan ilabi na nga indi lamang sa probinsya sang Capiz ang gina-cater kundi pati man sa probinsya sang Iloilo.
Subong nga bulan sang Pebrero, nagdamu liwat ang supply bangud madamo nga organisasyon kag talatapan ang nagapatigayon sang blood-letting activities.
Nagapanawagan man ang natungdan sa publiko nga padayon sa pag-donate sang dugo agud mapabilin nga stable ang supply kag matabangan ang mga nagakinahanglan.
INTERVIEWED BY: BOMBO ROADNIE DABAN DALANON
