ROXAS CITY – Ginhilway na sa karsel sang Ivisan Municipal Police Station, ang 23-anyos nga suspek nga nagbuno sa iya bayaw sa Barangay Ondoy, Ivisan Capiz, matapos nga nagtakop na ang reglementary period of detention sini.
Matandaan nga nag-angkon sang pilas sa magkatuhay nga bahin sang lawas ang biktima matapos ginapahayag ginbuno sang iya bayaw takna alas 7:50 sang gab-i kahapon nga adlaw Oktobre 9, 2023.
Ginkilala ang biktima nga si alyas “John”, 23-anyos samtang ang suspek amu si alyas “John Carlo”, 23-anyos kag lunsay residente sang Barangay Ondoy sang nasambit nga banwa.
Sa impormasyon nga nakuha sang Bombo Radyo sa Ivisan Municipal Police Station, ginapahayag nga magkaupod ang mga ini nagikan sa isa ka birthday party sang hinali na lamang nga may nagpatunga nga komosyon sa duha nga gintunaan sang insidente.
Mahibaluan nga makapila ka beses nga ginbuno sang suspek ang biktima rason nga nag-angkon ini sang pilas sa iya tiyan kag natuo nga bahin sang dughan.
Ang nasambit nga hinganiban ang ginabulubanta yara sa 7.5 pulgada ang kabahaon.
Bangud sa natabo, madasig nga ginpadangat sang mga Barangay Officials sang amu nga lugar ang biktima sa Roxas Memorial Provincial Hospital para sa nagakaigo nga pagbulong.
Samtang, takna alas 8:05 sang gab-i, sang ginturn over sang mga Barangay Officials ang suspek sa Ivisan PNP.
