IVISAN, CAPIZ – Gintuad sang utod sang suspek nga gindepensahan lamang sang iya utod ang kaugalingon bangud gin-unahan ini labo sang biktima rason nga nagbalos ini kag nalabo-patay ang biktima sa Sitio Pinamantawan, Mianay, Ivisan, Capiz.
Matandaan nga ginbawian sang kabuhi ang biktima nga si Isidro Celino Jr. matapos nag-angkon sang patal nga mga pilas sa lawas tuga sang pagpanglabo sang suspek nga si Joebel Labrador Sr. nga lunsay mga residente sang nasambit nga lugar.
Sa interview sang Bombo Radyo kay Mrs. Vilma Villar, utod sang suspetsado, napaminsaran lang suno diri sang iya utod nga depensahan ang kaugalingon bangud may yara pa ini sang tatlo ka mga kabataan nga PWDs.
Pahayag pa sini nga una nga nagkadto ang biktima sa ila lugar nga hubog nga nagawaras kag gintuyo nga lab-on ang suspek. Bangud sini nanginlaman suno diri ang biktima.
Dugang pa sini nga may daan na nga hiligut-anon ang duha kun sa diin nakaagi na nga gingubat sang suspek ang biktima.
Ginsiling pa ni Villar nga mabuot suno diri ang iya utod kag wala sang bisyo.
Sa pihak nga bahin, ginpahayag naman ni alyas Nene, utod sang biktima nga wala naggubat ang iya utod sa lugar sang suspek kag pahayag pa sini nga nagapati sila nga ginbanggaan kag ginlabo-patay ang ila utod nga papuli na kun tani sa ila balay.
Sa karon temporaryo nga ginhilway sa prisohan ang suspek bangud nagtakop na ang reglementary period of detention sini.
