ROXAS CITY – Ginkalain sang buot sang isa ka mister ang paglabo sang wala matumod nga persona sa ginahuptan sini nga baka sa Centro, Barangay Dinginan, Roxas City.
Suno kay Sammy Corros, ginkatingala sini kun ngaa madamo sang dugo ang nahamtang sa ginlambuhan sang baka sang tion nga magapahalab na ini kuntani.
Natukiban sini nga may igo na sang labo ang baka sa natuo nga tiil sini.
Mahibaluan nga nagdesisyon nalang ini nga igabaligya ang baka sa isa ka matadero apisar nga nanugunan ini bangud kapin 15 katuig niya na ini nga hinuptan.
Ginpahayag pa ni Corros nga madamo sang baka ang ginlambo sa lugar apang ginkatingala sini kun ngaa ang ginahuptan sini ang napilian nga lab-on sang wala pa matumod nga persona.
Gindugang pa sini nga wala man ini sang may nadumduman nga kontra nga posible magbalos sang paglabo sa ginahuptan sini nga baka.
Mahibaluan nga malapit lamang ang ginlambuhan sang baka apang wala ini sang matudlo nga suspek.
