ROXAS CITY – Yara na sa kostodiya sang pulisya sa syudad sang Roxas ang suspek nga nagluthang-patay sa 38-anyos nga lalaki nga nagabantay sang salakyan kaupod ang asawa sa waiting shed sa Barangay Lanot, Roxas City.
Ginkilala ang suspek nga si Erwin Belo 33-anyos, bus driver kag residente sang Barangay Binangig, Panay, Capiz.
Sa interview sang Bombo Radyo Roxas kay Superintendent Dante Tayco, hepe sang Roxas City PNP, nangin dalan para makilala kag maaresto ang suspek amo ang asawa sang biktima nga si Erna Clavaton nga positibo nga gintudlo si Belo nga amo ang nagluthang sa iya bana nga si Jorlyn Vim Clavaton.
Gilayon nga nagpatigayon sang hot pursuit operation ang mga pulis sa diin ginpalibutan nila ang lugar kag ginhulat nga magguwa ang suspek sa karsada.
Wala na nakapalag pa si Belo sang madakpan sang mga pulis sa diin makita sa iya nawong nga ginalauman na sini ang pag-aresto sa iya.
Sa pihak nga naaresto na ang suspek padayon pa ang imbestigasyon sang pulisya sa diin may naggaguwa nga crime of passion ang motibo sa krimen.
