ROXAS CITY – Napasakaan na sang kaso nga Homicide ang suspetsado sa pagpangluthang-patay sa iya kaugalingon nga hinablos sa Sitio Ilaya, Barangay Matnog Ivisan Capiz.
Mahibaluan nga ginkilala ang biktima kay Rowel Varcas kag ang suspek ang ginkilala kay Gary Varcas, yara sa legal nga pang-edaron kag lunsay mga residente sang nasambit nga lugar.
Matandaan nga suno kay Welma Varcas iloy sang biktima ginpahayag sini nga personal niya nga nasaksihan ang nagluntad nga kinagamo kag pagpangluthang ni Gary sa iya nga bata.
Suno diri, nag-ugat ang kinagamo sang nagpadulong sa ila balay ang suspek agud kuntani makighinala sa iya bana, apang nagpamalibad ang iya bana nga makig-istorya bangud yara sa impluwensya sang makahulubog nga ilimnon si Gary kag ginhinyu nga magpauli na kag sa masunod na lang adlaw maistorya.
Apang, ginkakibot na lamang sang iloy sang biktima nga nagbalik sa ila balay ang suspek kag may bitbit na ini nga armas-luthang kag ginhangkat sang tapungolay ang iya bana apang, wala sa gihapon ini ginsapak tubtob nga ginbadlong na lang ini sang biktima.
Dugang pa nga ginhakos pa sang iya bata ang suspek kag nagpakitluoy agud mauntat na ang kinagamo apang ginwakli ini ni Gary kag ginsumbag nga gintunaan sang pagkatumba kag madasig nga ginluthang ang biktima.
Ginpadangat pa sa ospital ang biktima apang gindeklarar nga dead on arrival sang doktor, samtang naka-ospital arrest naman ang suspek matapos nadakpan sang kapulisan.
Sa karun stable na ang kondisyon sang amu nga suspetsado kag nakaguha na ini sa ospital.
Samtang, yara na sa kustudiya sang Ivisan Municipal Police Station ang amu nga suspetsado.
