ROXAS CITY – Nakilan-an na sang kapulisan sang President Roxas MPS ang suspek sa pagpangbuno sa isa ka housing sa Barangay Viscaya sa banwa sang President Roxas.
Ginkilala ang suspetsado kay Jason Navarra, residente sang Barangay Cabugcabug sa nasambit nga banwa.
Suno kay Pcpt. Alfred De Leon, Chief of Police sang Pres. Roxas MPS sang mainterview sang Bombo Radyo, nakilan-an ang suspetsado pinaagi sa testimonya sang adopted son sang biktima nga natabuan yara sa lugar sang nagluntad ang insidente.
Mahibaluan nga wala nakita nga motibo sa suspek sa pagpangbuno sini kag posible nakursunadahan lamang ang biktima bangud sa impluwensya sang makahulubog nga ilimnon sang naga-inom ini kaupod ang iya barkada.
Dugang pa sang hepe, wala pa madakpan si Navarra apisar ginhingadlan na ini bangud tuman kalayo sini ang ginaistaran kag indi madali-dali kadtuan.
Sa pihak nga bahin, stable na ang kondisyon sang biktima matapos ang operasyon sini kag nagahulat nalang nga makaguha sa ospital agud makakuha sang medical certificate kag mapasakaan kaso ang suspek.
Matandaan nga ginbuno si Daniel Saura sang suspek gab-i sang sabado sang naglabay lamang ini sa isa ka pabahay kaupod ang iya nga bata.
