ROXAS CITY – May gina-uyatan na ang konseho sang Barangay Sibaguan, Roxas City nga pangalan sang responsable sa pagpanghilo-patay sa 34 ka mga ido kag 2 ka mga kuring sa Happy Homes Subdivision sa amo nga lugar.
Ini ang ginpahayag ni Punong Barangay Johnny Arciga sang mainterview sang Bombo Radyo.
Suno kay Arciga nga gilayon nga nagpakig-angut ang Home Owners Association sang amo nga subdivision sa konseho sang barangay kag ginpalab-ot ang nasambit nga insidente.
Kasunod sang maid-id nga pagpangusisa, nahibaluan nga Chief Security sang Pueblo de Panay nga residente sang Barangay Dayao ang ginatudlo nga suspek.
Ini bangud ang amo nga suspek ang una na nakahambal sa security guard sang subdivision nga panugyanan ang mga residente nga himuson ang ila nga hinuptan nga mga ido.
Dismayado ang mga residente bangud sa baylo nga nagreport kuntani ang amo nga suspek sa asosasyon, naghimo ini sang kaugalingon nga pamaagi agud pamatyon ang mga kasapatan.
Natalana suno kay Arciga nga ipatawag sa barangay ang ginatudlo suspek.
Desidido naman ang mga home-owners sa amo nga subdivision nga magpasaka sang nagakaigo nga panumbungon batuk sa suspetsado.
Matandaan nga base sa pagpangusisa sang Bombo Radyo sa mga residente, may yara sang lalaki nga sakay sa isa ka salakyan ang nag-ula sa karsada sang mga ginaalegar karne nga ginapahayag may yara sang hilo.
