ROXAS CITY – Nagakabalaka sa karon ang mga residente sang Barangay Pawa, Panay, Capiz kasunod sang insidente sang pagpanghimulos sa 35 anyos nga ginang nga may deperensiya sa paminsaron sa sulod mismo sang ila balay sa nasambit nga lugar.
Mahibaluan nga natumod na sang mga kapulisan ang suspek nga ginkilala kay Paulo Bolilio alyas Bimboy, isa ka ex-convict nga tumandok sang Barangay Linateran, Panay.
Nahibaluan nga may rekord sang pagpangawat ang suspek kag duha ka bulan pa lamang ang nakaligad sang ini ang nakaguha sa presuhan.
Kasunod sang pagdangop sang pamilya sang biktima nga si alyas Inday sa mga otoridad, nagtuhaw man ang duha ka mga ginang nga ginapahayag gintuyo man nga himuslan sang suspek.
Suno kay alyas Ann, maayo na lamang bangud kaupod sini ang iya bana sang makit-an nga sa guha sang ila balay ang suspek nga kasubong nagapanilag rason nga sang ila ini ginsaway, madasig ini nga nagdalagan.
Suno naman kay alyas Jen, nagakatulog na siya sang iya nabatyagan nga may nagahimas sa iya nga lawas kag kasubong gina-alsa ang iya panapton.
Gintutukan pa siya sang suspek sang matalom nga bagay apang posible nakonsensiya ini sa paghibi kag pagpakitluoy ni alyas Jen kag ginbiya man sini ang lugar.
Sa karon, padayon nga ginaayam sang mga otoridad ang suspek agud magpanabat sa pagpanghimulos kay alyas Inday kag tuyo man nga pag-molestiya sa duha ka iban pa.
