PRESIDENT ROXAS, CAPIZ – Anay na nga napriso sa kasubong man nga kaso ang suspek sa pagpanglabo-patay sa isa ka 38-anyos nga lalaki, matapos ginlabo sang kaupod sini sa ilimnan sa Barangay Badiangon, President Roxas, Capiz.
Matandaan nga wala na sang kabuhi sang ginpadangat sa ospital ang biktima nga ginkilala kay alyas “Silverio”, 38-anyos kag residente sang nasambit nga barangay.
Sa interview sang Bombo Radyo kay PMAJ Rachelle Garnica, hepe sang President Roxas PNP, ginapahayag nga ang suspetsado ang ginkilala kay alyas “Willy”, 51-anyos, residente man sang nasambit nga lugar ang may kaangay na nga kaso sang una nga kun sa diin, ginlabo nya man sini ang iya utod. Ginhunong ini sa karsel apang nakaguwa naman gilayon.
Dugang pa ni Garnica, naga-inom-inom sang makahulubog nga ilimnon ang suspek kag biktima, kaupod si alyas “Mike”, sang may nagluntad nga mainit nga pagbinaisay sa tunga sang suspek kag ni alyas Mike.
Magatambag lang kuntani sa duha ang biktima apang, hinali nalang ini nga ginlabo sang nasambit nga suspek.
Bangud sini, nag-angkon sang patal nga pilas sa magkatuhay nga parte sang lawas ang biktima nga gintunaan sang iya kamatayon.
Nakuha sa lugar ang matalum nga hinganiban nga gingamit sa natabo nga krimen.
Boluntaryo naman nga nagsungka sa talatapan ni Mayor Receliste Escolin ang suspek kag gin-turn-over sa nagresponde nga mga kapulisan.
Samtang, desidido naman ang pamilya sang biktima nga magpasaka sang kaso batuk sa suspetsado.
Sa karon, nakahunong na sa karsel sang President Roxas MPS ang suspetsado para sa nagakaigo nga disposisyon.
