Nakabaton naman sang mga kapareho nga reklamo ang barangay nagikan sa iban pa nga mga residente ang lalaki nga ginapahayag suspek sa paglingling sa isa ka dalaga sa Sitio Santiago, Barangay Libas, Roxas City.
Matandaan nga ginkilala ang biktima kay alyas “Rosana”, 19 anyos, samtang ang ginatudlo suspek ang ginkilala kay alyas “Arnel” yara sa legal nga pang edaron, kag lunsay residente sang nasambit nga lugar.
Sa interview sang Bombo Radyo kay Punong Barangay Jobby Nalica sang Barangay Libas, ginpahayag sini nga indi lamang isa ka bes nga nakabaton ang mga ini sang kapareho nga isyu nga nagapanglingling ang amo nga suspek. May pila naman suno ini sila nga mga nabalhag nga reklamo nagikan sa iban pa nga mga pumuluyo.
Dugang pa ni Nalica, sang nabaton sini ang reklamo, gilayon nila ini nga gin-aksyunan apang sang tion nga ginpadulungan na sang mga tanod sini ang puluy-an ni Arnel para sa summon, wala na ini makita.
Sa karon, ginahulat nalang ang presensya ni Arnel nga makighinun-anon sa ila barangay kag atubangon ang isyu nga ginahaboy batuk sa iya.
