ROXAS CITY – Ginhingadlan na sang mga kapulisan ang suspek sa likod sang serye sang pagpanghold-up sa syudad sang Roxas.
Ginkilala ang suspek kay Mark Uy y Cortada, kag temporaryo nga nagapuyo sa Barangay Mongpong sini nga syudad.
Sa interview sang Bombo Radyo kay PLt.Col. Aron Palomo, hepe sang Roxas Component City Police Station ginpahayag sini nga natigayon nga matumod ang suspek pinaagi sa mga opisyal sang nasambit nga barangay kag kooperasyon sang pila ka mga residente.
Gilayon naman nga naghiwat sang hot pursuit ang mga kapulisan apang nakapalagyo ang suspek.
Narekober sa lugar ang isa ka bala sang 9mm caliber pistol kag mga lago nga panapot ni Uy nga gin-usar sa pagpanghold-up nga positibo naman nga ginkumpirmar sang mga biktima.
Suno kay Palomo, anay Person Deprived of Liberty (PDL) si Uy nga may kaso nga murder kag homicide.
Tuman ka delikado ang amu nga sahi sang tawo bangud may posibilidad nga magbato sa mga kapulisan kag mabutang sa peligro ang kabuhi sang mga pumuluyo.
Nagpakig-angut na ang hepe sa San Enrique Police Station, bangud ba-se sa impormasyon nga nakuha, ang grupo ni Uy ang imbolbado sa pagpanghold-up-patay sa isa ka German National sa San Enrique, Iloilo.
Sa karon, ginaplastar na ang kaso nga Robbery Hold-up batuk kay Uy kag nagapadayon ang pag-ayam sang kapulisan sa posible nga ginakahamtangan sang suspek.
Samtang, mas ginpasangkad pa sang mga kapulisan ang police visibility kag pagpatrolya sa syudad ilabi na sa kagab-ihon agud malikawan ang nagakahinabo nga krimen.
