ROXAS CITY – Amat-amat nga nagasaka ang kaso sang balatian nga Covid-19 apang preparado kag bastante ang bulong sa syudad sang Roxas.
Ini ang nangin pahayag ni Mr. Ronald Amigo, Assistant Department Head, kag Covid-19 Task Force Roxas City Coordinator sang mainterview sang Bombo Radyo.
Suno diri, ang mga nabalhag nga positibo kag aktibo nga kaso sang nasambit nga balatian kalabanan mild kag asymptomatic lamang subong, lain sang mga nakaligad nga malala ang mga ginabatyag sang pasyente.
Bangud man ini suno diri sa bulig sang bakuna nga nagapamatuk sa virus kag sa ginpatuman nga executive order ni Mayor Ronnie Dadivas nga pag-obserbar sa minimum health protocols, gani tinguwaan pa nila nga mabakunahan ang mga nabilin pa nga wala nakapa second dose.
Ginsiling ni Amigo nga gilayon ang pag-aksyon sang Covid-19 task force sang nagamat-amat saka ang kaso sang Hunyo agud indi na maglala pa.
Ikumparar sa iban nga syudad kag probinsya mas manubo suno diri ang kaso sang Covid-19 sa probinsya sang Capiz kag preparado man pananglitan magtaas ini.
Nagprocure man sang Molnupiravir pill, nga bulong para sa Covid kag ginpanghatagan ang mga pasyente para sa ila madasig nga pag-ayo kag indi na mag-abot pa sa mas malala nga kondisyon ang ila kahimtangan.
Sa pihak nga bahin, nangin masadya suno diri si Mayor Dadivas sa iya pagbisita sa Temporary Treatment and Management Facility (TTMF) sa Hortus Botanicus bangud preparado ini sila, apisar wala pa sang pasyente, kag bastante diri ang suplay sang bulong para sa Covid.
Gintuad man ni Amigo nga isa ang syudad sang Roxas sa napilian sang DOH nga pahamtangan sang RT-PCR laboratory bangud sa maayo nga performance sang syudad sa pag-aksyon sa nasambit nga balatian, kag top performing city man sa bug-os nga Pilipinas bangud sa kalidad nga pagresponde batuk sa Covid.
Panugyan sini sa pumuluyo nga magpartisipar kag magpangamuyo nga mangin luwas na sa nasambit nga virus ang syudad sang Roxas kag probinsya kag Capiz.
