ROXAS CITY – Patay ang isa ka solterito matapos nga nagbitay sa sulod sang iya hulot sa Barangay 5, Roxas City.
Ang wala na ginhingadlan nga biktima ang naga-edad sang 17 anyos nga isa ka taekwondo jin.
Base sa nakuha nga impormasyon sang Bombo Radyo, ginsaka sang iya pakaisa ang biktima sa sulod sang hulot kag sa iya kakibot nakit-an niya ini nga nagakabit na sa balayan gamit ang red belt kag wala na sang kabuhi.
Suno sa utod sang biktima, wala pa sila sang ideya kun ano ang madalom nga rason sang iya magulang sa pag-utas sa iya kabuhi bangud wala man ini nakasugid nga siya ang may problema.
Suno naman sa isa ka barangay health worker, isa ka mahipuson nga bata ang biktima.
Ginpahayag pa sini nga wala man sila sang ideya kun ano ang rason sa paghikog sang biktima bangud maayo man ang pagtamdanay sang ila pamilya.
