ROXAS CITY – Pilas ang naangkon sang isa ka tag-iya sang KTV Bar, matapos nga ginbuno sang kaugalingon sini nga waiter sa Plaridel St., Brgy. VIII, Roxas City.
Ginkilala ang biktima nga si Emma Aguilar, 64-anyos tag-iya sang KTV Bar samtang ang ginatudlo suspek ang ginkilala kay Allan Abarca, 40-anyos lunsay mga residente sang nasambit nga lugar.
Sa impormasyon nga nakuha sang Bombo Radyo nagikan sa Roxas City PNP, ginpahayag nga samtang ang biktima kag si Jimmy Inalisan ang naga-istorya sa kusina sa mismo kilid sang balay sini ang nasambit suspek hinali lamang nga naguha sa kwarto sini kag gulpi nga ginbuno ang biktima.
Bangud sini, nag-angkon sang pilas sa tyan ang biktima.
Mahibaluan nga bilang pagdepensa, ginlampusan ni Inalisan ang suspek gamit ang plastic nga bangko.
Gilayon man nga nagresponde ang BPAT sa lugar kag ginpadangat sa pribado nga ospital ang biktima samtang ang suspek yara na sa kustodiya sang Roxas City PNP para sa nagakaigo nga disposisyon.
