Ginpahayag sang Taiwan nga nasiplatan sini ang 24 nga Chinese military aircraft malapit sa isla samtang naga-agi ang isa ka Canadian warship sa Taiwan Strait, isa ka importante kag sensitibo nga alagyan sang tubig.
Ang pag-agi sang Canadian naval vessel, ang una nga transit sini subong nga tuig base sa pahayag sang Ministry of Foreign Affairs sang Taiwan.
Natabo ang insidente pila ka adlaw matapos nag-agi ang duha ka US ships sa parehas nga alagyan.
Mahibaluan nga ang Taiwan Strait, masami nga ginatabok sang Estados Unidos kag mga kaalyado sini agud pabakuron ang status sini bilang isa ka international waterway, nga nagresulta sa pagka-akig sang China.
Matandaan nga gin-ako sang Beijing ang Taiwan bilang kabahin sang teritoryo sini apisar nga wala sini ginpamunuan ang pungsod kag padayon nga nagpamahog nga sakupon ini gamit ang puwersa sang military.
Samtang, ginkumpirmar naman sang Ministry of Foreign Affairs sang Taiwan nga ang HMCS Ottaw, isa ka Halifax-class frigate sang Royal Canadian Navy, ang nag-agi sa Taiwan Strait sadtong Pebrero 16.
Matandaan nga ginsambit sang Canada nga ang luyag sini suportahan ang kahilwayan, kalinong, kag bukas nga importasyon sa Taiwan Strait.
Bilang sabat sa pag-agi sang Canadian warship, ginpahayag sang Ministry of National Defense sang Taiwan nga nagpatigayon ang China sang “joint combat readiness patrols” sa palibot sang isla, gamit ang 24 nga aircraft, kalakip ang mga fighter jet kag drone, subong man ang mga military vessels.
Kaangut sini ginpahayag man sang mga Taiwanese media nga samtang naga-agi ang Canadian warship, nag-radyo suno diri ang militar sang China kag nagpaandam sa barko nga magbag-o sang ruta.
Ang mga tinalikdan nga aktibidad sang militar sang US sa Taiwan Strait nakabaton man sang kritisismo nagikan sa Beijing.
Sadtong Pebrero 10, isa ka US destroyer kag isa ka ocean survey ship ang nag-agi sa strait, nga gintawag sang China nga isa ka “sala nga signal” nga nagahatag sang delikado sa seguridad.
Suno naman sa datos nagikan sa Ministry of National Defense sang Taiwan, 62 Chinese military aircraft ang ila na monitor malapit sa isla sa sulod sang 48 oras kadungan sang paglabay sang mga
US ships.
Ang pinakabag-o nga mga tikang sang US sa Taiwan Strait nagmarka sang una nga tion sumugod sadtong panahon sang administrasyon ni US President Donald Trump, kadungan sang pahayag nanday Trump kag Japan Prime Minister Shigeru Ishiba nga ginpamalabagan nila ang anu man nga pagtinguha nga bag-uhon ang status quo sang Taiwan Strait pinaagi sang puwersahan nga pagpanghadlok.
