Ginreklamo sang isa ka lalaki sa talatapan sang Roxas City PNP ang ginaalegar nga ginkawat nga tangke sang Liquefied Petroleum Gas (LPG).
Ginkilala ang biktima kay alyas Jimboy, residente sang Barangay Dinginan, Roxas City.
Sa interview sang Bombo Radyo kay Jimboy, ginpahayag sini nga takna alas-10:40 sang aga, nagparking ini sa bahin sang Roxas Avenue, ginbilin sini nga nakahigot ang amo nga tangke sa iya motorsiklo kag nagpadulong sa Teodoro Arcenas Trade Center (TATC) agud magpanindahan.
Sang nagbalik ang biktima sa ginparkingan sini, wala na ang tangke sang LPG nga iya ginbilin sa motorsiklo kag ang higot nalang sang tangke ang nabilin sa iya motorsiklo.
Dugang pa ni Jimpoy, aminado ini nga nangin kumpante ini nga ibilin ang amo nga tangke apang sa karon wala na ini sang mahimo kay natabo na ang amo nga sitwasyon.
Panugyan sini sa mga pumuluyo, siguruhon permi ang mga pagkabutang kag indi magsalig sa mga dalanon kay nagalapta sa karon ang mga makawat sa palibot.
