ROXAS CITY – Ginaakusahan sang isa ka tanod sang Barangay San Jose, Roxas City ang presidente sang Roxas City Disaster Victims Association sang pagpangawat sa mga materyales sa mga bakante nga housing unit sa Angelville Subdivision, sang nasambit nga barangay.
Suno kay Rolando Avelino nga ginagamit lamang ni Mr. Roderick Dela Cruz ang mga kabataan agud masugo ini nga mapangawat sang mga materyales sa mga bakante nga housing unit sa amo nga lugar.
Gindugang pa ni Avelino nga ginabayaran lamang sang kwarta ni Dela Cruz ang mga kabataan agud magpati sa iya ginasugo.
Magluwas diri ginapasugtan pa ni Dela Cruz nga himu-on sang tambayan sang mga pamatan-on ang pila ka mga bakante nga housing unit.
Suno pa kay Avelino nga madugay na ini nga ginakumbinsi nga magpamiyembro sa asosasyon nanday Dela Cruz apang nagpamalibad ini bangud magluwas sa membership fee nga P150 may bulanan pa gid nga balayaran.
Ginpanindugan ni Avelino nga madugay na nga ginahimo ni Dela Cruz ang pagpanunto sa pila ka mga pumuluyo.
