Ginpatpat sang Hepe sang Tapaz Municipal Police Station ang mga accomplishments sang ila talatapan sa Tapaz, Capiz maghalin January tubtob September 30 sa subong nga tuig 2025.
Sa interview sang Bombo Radyo kay Police Captain Jobert Delos Reyes, hepe sang Tapaz Municipal Police Station, iya ginpakigbahin ang mga accomplishments sang ila nga talatapan agud mapabilin ang kalinong kag katawhay sang palibot.
Ang mga accomplishment ang resulta sang nagkalain-lain nga kampanya nga ginpatigayon sa amo nga panahon.
Sa kampanya batuk sa pagdakup sang mga wanted persons sa banwa, may yara sang 13 nga wanted person ang nadakpan gikan sa regional, provincial kag municipal nga operations.
Sa kampanya batuk sa paghupot sang iligal nga armas-luthang, may yara sang 5 nga nagturn-over sang loose firearms bangud wala sang nakaigo nga lisensya kag 6 ka armas-luthang ang temporaryo nga ginsurrender samtang gina proseso ang lisensya sang tag-iya. May ara man sang natabo nga kinagamo kun sa diin may gin-aresto ang kapulisan nga isa ka lalaki nga nagabitbit sang armas-luthang kag gilayon nga ginpasakaan sang nagakaigo nga panumbungon.
Sa kampanya kontra droga ukon ang paglapas sa Republic Act 9165 (Comprehensive Dangerous Drugs Act of 2002,) kun sa diin may yara sang 4 ka naaresto sa 4 nga ginpatigayon nga operation. May yara sang nakuha nga 56.37 grams sang iligal nga druga nga may balor nga 383,415.
Sa kampanya batuk sa community insurgency, may yara sang isa ka katapo sang community terrorist group ang nagsungka kag nagbalik sa sabak sang gobyerno. Nahibaluan nga maghalin tuig 2023, may yara na sang 37 ka mga surenderee ang talatapan.
Pag-abot naman sa seguridad, ginapalig-on sang Tapaz Municipal police Station ang police visibility sa pamaagi sang paglibot sang mga patrol kag magpatigayon sang checkpoint agud mangtsekyar sang sitwasyon sang palibot kag community engagement kun sa diin nagapatigayon sang lectures ang mga kapulisan sa mga estudyante kag mga pamulong-pulong sa mga manunudlo kag iban pa nga mga indibidwal.
Isa pagid ka programa ang sa karon amo ang programa sang Philippine National Police nga 911 National Emergency Call sa diin amo ang pagpangayo sa ila sang bulig pamaagi sa pagpanawag gamit ang telepono ukon cellphone agud pagarespondehan sa gilayon.
Pahayag pa ni Delos Reyes, nagapasalamat siya sa kooperasyon sang mga pumuluyo kag local government unit sang banwa sang Tapaz lakip na ang mga kapulisan nga wala sang pahuway sa paglibot kag pagbulig sa komunidad.
Dugang pa sang natungdan, padayunon ang pagpakigbahin sa mga programa sang kapulisan kag kun mahimo maglikaw sa mga iligal nga buluhaton agud mapabilin ang kalinong kag katawhay.
