ROXAS CITY – Posible nga ‘alibi’ ukon balibad na lamang sang pamilya sang mga nagkaladakpan sang mga kapulisan nga nagapatigayon sang ilegal nga bulang nga kabahin sang ila kustombre bilang indigenous people ang pagpauwak sang manok.
Ini ang kasunod sang pagkadakop sang 16 ka mga indibidwal sa Barangay Wright, Tapaz, Capiz bangud sa ginapahayag ilegal nga pagpatigayon sang bulang.
Suno kay Police Captain Bryant Fallera, hepe sang Tapaz PNP, imposible wala makahibalo ang mga naaresto nga bawal ang pagpatigayon sang ilegal nga bulang bangud nagpadulong pa sila kay Tapaz Mayor Roberto Palomar agud matigayon ang ila nga aktibidad.
Apang ginapahayag nga wala ini ginpirmahan sang alkalde bangud may yara sang legal nga cockpit arena sa amo nga banwa.// Ginpanindugan ni Fallera nga posible wala na sang may narekober nga kwarta sa operasyon sang mga pulis bangud madamo na sang nakapalagyo kag wala naman ginrekisa ang mga nadakpan.
Bangud diri narekober sang mga kapulisan ang 23 ka mga manok, bulang kag iban pa nga mga kagamitan.
Gindugang pa ni Fallera nga mismo ang mga barangay officials ang nagkumpirmar nga may yara sang nagakahinabo nga ilegal nga bulang rason nga ila ginkasa ang operasyon.
Sa karon napasakaan na sang panumbungon nga paglapas sa Presidential Decree 1602 ukon illegal gambling ang mga arestado.
