ROXAS CITY – Nagpatigayon sang pagsinapol ang pila ka tag-iya sang commercial fishing vessels kaupod si Governor Fredenil Castro nga amu mismo ang nagpatawag sa ila.
Sa interview sang Bombo Radyo kay Atty. Luvim Amores, PIO sang Provincial Government, gintuad niya nga sa tion sang pangampanya sang gobernador, nakita sini ang kabudlay sang pamilya sang mga mangingisda sang nagpadulong ini sa mga coastal barangays sang kabanwahanan rason nga luyag niya ini buligan.
Mahibaluan nga indi mahimo makapangisda sa sulod sang 15 km radius kag iligal naman kun magsobra ukon maglapaw diri bangud kinahanglan sang lisensya gikan sa Marina antes tugutan makapangisda.
Mangin maiwat kag magastos naman sa mga mangingisda suno diri ang pagkuha sang lisensya bangud sa madamo ang rekisitos nga kuwaon sa nagkalain-lain nga ahensya sa syudad, kag ipasa sa Marina nga sa probinsya sang Iloilo pa nahamtang.
Bilang bulig sa mangingisda, naghinun-anon si Gov. Castro kag ang Sangguniang Panlalawigan members nga maghimo sang resolusyon sa pag-establisyar sang “one-stop-shop” kun sa diin nagkoordinar sila sa Marina nga magpahamtang diri sa Roxas City sang temporaryo nga talatapan.
Maga-extend man ang pagtukod sang Marina nga matigayon kuntani sa Setyembre apang ginhinyo sang mga mangingisda nga tagaan pa sila sang oras sa paghikot sang dokumento nga ipasa kag mangin compliant ang ila fishing vessel nga ginagamit.
Ginpunto ni Amores nga indi mahimo nga pasugtan magpangisda sa ginadumilian nga kilometros kapareho sang ginahinyo sang iban bangud indi luyag ni Gov. Castro nga paglapas sa layi ang mangin solusyon.
Sa pihak nga bahin naintindihan man sang gobyerno probinsyal suno diri ang kabudlay sang magagmay nga mangingisda ukon fisherfolks rason nga nagpatigayon sila sang inisyal nga paghinun-anon nga magtukod sang Task Force Masa ukon kontra Kaimolon kun sa diin may mga personnel nga magakadto sa coastal barangays, una diri sa syudad kag masunod sa kada banwa, hibaluon ang ila data kag background, kag posible magahatag sang livelihood ang provincial government.
Mensahe sini sa mga mangingisda nga manggaranon ang kadagatan sa probinsya gani mangin responsable sa pagpangisda, hangayan ang dunang manggad kag sundon ang layi.
