ROXAS CITY – Naka-deploy na ang mga kapulisan sa magkatuhay nga mga lugar sa probinsiya agud magpatuman sang hugot nga seguridad kag mapasiguro nga mangin malinong kag matawhay ang selebrasyon sang Capiztahan 2019.
Ini ang ginpahayag mismo ni Police Colonel Canilo Fuentes kadungan sang ginpatigayon nga send-off ceremony sa Capiz Villareal Stadium.
Mahibaluan nga may yara sang gintukod nga Task Group Capiztahan 2019 agud mapasiguro nga mangin malinong kag matawhay ang nasambit nga aktibidad.
Ang nasambit nga task group ang may yara sang tatlo ka mga sub-task groups kun sa diin may grupo para sa seguridad, peace and order kag emergency response.
Kapin sa 819 ka mga kapulisan ang ginpang-deploy kadungan sang amo nga aktibidad kun sa diin ang 155 sa mga ini ang gikan pa sa Police Regional Office (PRO-6).
Suno pa kay Col. Fuentes nga target nila ang zero-major incident kadungan sang nasambit nga selebrasyon.
Pahamtangan man sang mga kapulisan ang pila ka mga strategic areas kag mga lugar nga pagahiwatan sang mga aktibidad sa diin ginalauman nga magadugok ang madamo nga mga tawo.
Ginpasiguro man sang opisyal nga naka-alerto ang mga kapulisan sa probinsiya agud mapabilin ang kalinong sa nasambit nga selebrasyon.
Ang Capiztahan 2019 ang natalana humalin Abril 12 tubtob 15 sini nga tuig apang sadtong Abril 6 pa nagsugod na ang pila ka mga pre-Capiztahan activities.
