Dakop ang tatlo ka mga indibidwal matapos nga nagpatigayon sang illegal nga pasugal sa magkatuhay nga operasyon sa probinsya sang Capiz.
Sa impormasyon nga nakuha sang Bombo Radyo nagikan sa Capiz Police Provincial Office, ginapahayag nga una diri nadakpan ang isa ka indibidwal sa Barangay Tabuc Norte, Panitan kun sa diin naaktuhan ini nga nagapatigayon sang “Pick 2” kag nakuhaan sang isa ka koteho kag mga kwarta.
Ika-duha ang nagikan sa banwa sang Cuartero nga nagapataya sang small town lottery (STL) kag ang ika-tatlo ang nagikan sa Barangay Banica, Roxas City kun sa diin dakop ang isa ka babaye sa ginpatigayon nga entrapment operation sang kapulisan.
Nagapangatubang sa subong ang mga nagkaladakpan sa kaso nga paglapas sa Presidential Decree 1602 nga gin-amyendahan sang Republic Act 9287.
Ang nasambit nga operasyon ang padayon nga kampanya sang Capiz Police Provincial Office batuk sa illegal nga pasugal sa probinsya.
Sa subong, yara na sa kustodiya sang magkatuhay nga karsel ang nagkaladakpan para sa nagakaigo nga disposisyon.
Reported by Bombo Jessa Mae Siman De Los Santos
