ROXAS CITY – Dakop ang tatlo ka mga persona, matapos ang ginkasa nga drug buybust operation sang katapo sang Capiz Police Provincial Drug Enforcement Unit (PPDEU) sang Capiz Police Provincial Office kaupod ang Cluster SDET nga ginakabig-usan sang katapo sang Panitan Municipal Police Station, kag Maayon Municipal Police Station sa Barangay Tanza Sur, Panay, Capiz takna alas 10:53 kagab-i Oktobre 1, 2023.
Ginkilala ang mga nagkaladakpan nga sanday Hermie Buenvinida, Alyas “Bani” 39-anyos residente sang Barangay San Jose, Roxas City, Norberto Balbona , 49-anyos, residente sang Brgy. 1, Roxas City, Capiz kag Famy Lipura, 25-anyos residente sang Tambak New Washington, Roxas City, Capiz.
Nakuha sa posesyon sang mga nagkaladakpan ang kapin 10 gramos sang ginapatihan iligal nga droga nga may Standard Drug Price P68,000.00, P100.00 buybust money, P5,400.00 boodle money, 2 ka pouch nagaduag asul kag 2 ka sling bag, nagaduag brown.
Sandig sa impormasyon nga nagikan sa Panay Municipal Police Station, ginakabig nga Street Level Individual (SLI) ang nasambit nga mga persona.
Kaso nga paglapas sa Republic Act 9165 ukon Comprehensive Dangerous Drugs Act of 2002 ang paga-atubangon sang mga nagkaladakpan.
Sa karun yara na sa karsel sang Panay Municipal Police Station ang mga arestado para sa nagakaigo nga disposisyon.
