Nabutang karon sa kontrobersiyal ang talatapan ni Mayor Christopher Andaya sang banwa sang Sigma bangud sa nangin kaundan sang diskurso pribilihiyo ni Sangguniang Bayan member Norman Marcelino.
Nasaad sa privileged speech ni SB member Marcelino ang palamangkutanon sa gindalahigan nga aksidente sang tatlo ka mga salakyan nga ginapanag-iyahan sang banwa sang Sigma kag yara sa idalum sang Office of the Mayor sang tuig 2018, 2019 kag sini nga tuig 2021.
Kalakip diri ang Honda CRV, Ford Ranger kag Nissan Terra nga indi na makita sa karon matapos nadalahig sa aksidente sa banwa sang Panit-an kag Barangay Mianay, Sigma, Capiz.
Ginpahayag nga wala gin-imporma ang katapu sang Sangguniang Bayan sa natabo sa tatlo ka mga salakyan nga propedad sang gobyerno nga dapat ginpahibalo bangud kinamatarung sang mga pumuluyo nga mahibaluan ang natabo kag kun diin na sa karon ang amo nga mga salakyan.
Ginapamangkot man sa diskurso pribilihiyo kun may liabilidad ang nagamaneho sini nga gingamit ang salakyan sa indi opisyal nga function.
