Magapatuman ang Bureau of Internal Revenue (BIR) sang tax fraud investigation sa mga kontraktor nga naulamid sa maanomaliya nga flood control projects nga gintumod ni Presidente Ferdinand Marcos Jr.
Sa isa ka pahayag, ginsiling ni BIR Commissioner Romeo Lumagui Jr. Nga magapatigayon sila sang audit sa tax returns kag payments sang nasambit nga mga entity.
Ginmanduan man ang BIR offices nga hugot nga bantayan ang mga developments sa imbestigasyon sang Presidente kag magpatigayon sang parallel audit sa mga naulamid nga kontraktor.
Pananglitan may mga kontraktor nga underpaid ukon nagalikaw sa pagbayad sang buwis, indi sila pag-isyuhan sang bureau sang updated tax clearance kag madiskwalipika ang kontraktor nagikan sa pagpasakop sa procurements sang gobyerno sa palaabuton kag paga-suspendihon ang ila nga mga kontrata sa gobyerno.
Ang nasambit nga direktiba ang kasunod sa Revenue Regulation No. 17-2024 nga nagamando sa mga kontraktor sang gobyerno nga kinahanglan makaangkon anay sang updated tax clearance nagikan sa BIR antes ang final settlement sang ano man nga kontrata sa gobyerno.
Ginsiling pa sang opisyal nga pagasiguraduhon sang BIR nga nagabayad sang nagakaigo nga buwis ang tanan nga kontraktor sa pungsod.
Suno sa iya, indi nila mabaton nga nagakita sila halin sa minilyon nga ginapondohan nga buwis sang mga Pilipino kag negosyo apang indi sila nagabayad sang tama nga buwis.
Pag-abot naman sa nareport nga ghost flood control projects, sa tion makumpirma nga matuod wala sang mga proyekto, maga-isyu ang BIR sang deficiency tax assessments batok sa mga naulamid nga kontraktor.
