ROXAS CITY – Pagkuga ang ginkabangdan sang kamatayon sang 49-anyos nga taxi driver nga nasapwan nga wala na sang kabuhi sa compartment sang salakyan sa Barangay Poblacion Ilawod, Dumarao, Capiz.
Sa interview sang Bombo Radyo Roxas kay Chief Inspector Dr. Joe Martin Fuentes, hepe sang Scene of the Crime Operations (SOCO) Capiz, ginpahayag sini nga napatay pinaagi sa asphyxia by strangulation ukon pagkakuga ang biktima nga si Jessie Cabitin.
Daku man ang posibilidad nga paha ang gingamit sa pagkuga sang suspek nga nagapungko sa nalikod nga bahin sang driver’s seat.
Nagaguwa man sa autopsy examination nga tatlo tobtob 24 oras na nga patay ang biktima sang masapwan.
Samtang robbery-hold-up ang ginatutukan sang mga pulis nga motibo sa krimen bangud suno sa asawa sang biktima, may kuwarta nga P4,000 sa nadula nga wallet sang iya nga mister.
