ROXAS CITY – Nakabatyag sang kahadluk ang mga OFWs nga yara karon sa pungsod Ukraine bangud sa nagalala nga tension sa tunga sang Ukraine kag Russia.
Sa pagpakig-angut sang Bombo Radyo Roxas sa Capizeña nga nagatrabaho sa Ukraine nga si Melissa Frias, preparado na ang embahada sang Pilipinas nga i-repatriate sila kun padayon nga maglala ang tension sa amo nga pungsod.
Nahibaluan nga nakahanda naman ang mga soldado sang Ukraine nga na-deploy sa border sang duha ka mga pungsod sa posible pagsalaky sang Russian soldiers.
Aminado man si Frias nga naga-panic na ang iya employer bangud sa nabatian nga mga report.Magluwas diri masami na nga naga-agi ang chopper kag military plane sa ila lugar.
Pananglitan mag-ibwal ang giyera suno kay Frias nga may lugar sila nga sarang padulungan agud makapanago.
Samtang nahibaluan nga may 1st batch sang mga OFWs ang nakapauli na sa Pilipinas sa kahadluk nga maglala ang tension kag matabo ang ginaka-hadlukan nga giyera.
