ROXAS CITY – Nagapanawagan ang mga market vendors sa Teodoro Arcenas Trade Center sa Roxas City Government may kaangtanan sa paghatag sang permit sa mga talipapa vendors sa mga kabarangayan sa syudad sang Roxas.
Sa interview sang Bombo Radyo sa fish vendor, iya ginpahayag nga indi sila pabor nga matugutan ang mga talipapa vendors nga mahatagan sang permit.
Luyag nila kuntani mahatagan na sang nagakaigo nga igtalupangod ang madugay na nila nga ginahingyo sa City Government partikular ang pagpahalin sa tanan nga talipapa vendors sa sulod sang nasambit nga mercado.
Bangud kun indi ini matabo suno sa fish vendor, magapadayon ang pagkalunod nila sa kautangan kag magalala ang ila nga sitwasyon sa pagbaligya bangud mahina ang baklanay.
Nahibaluan nga base sa pahayag sang mga market vendors, madamo na sang nag untat nga mag baligya sang isda sa TTeodoro Arcenas Trade Center–indi lamang sila kundi pati mismo ang mga nagabaligya sang karne sa sulod merkado.
Panawagan nila sa City Government nga kuntani mahatagan na ini sang kasolbaran bangud dako ini nga problema sa ila nga palangabuhian.
