ROXAS CITY – Ginpanginwala sang pinuno sang Tricycle Franchising and Regulatory Unit (TFRU) ang alegasyon nga may ginpa-hold ini nga mga papeles sang tricycle operator agud indi ma-proseso ang pagpa-renew sang frankisa sang ila tricycle.
Ginpahayag ni Mr. Edgar Andrade nga wala sang rason para ipa-hold ang mga papeles sang bisan sin-o bangud magalawig pa sa Marso 15 ang processing kag may extention pa ini nga tobtob sa Abril 15.
Ginapanindugan sini kun na-comply man lamang ang kinahanglanon nga rekisitos kag yara ang tricycle kag personal presence sang tag-iya, sarang na nga masuguran ang pagproseso sang renewal sa ila frankisa.
Ginabalik lamang ang mga papeles sa mga franchise holders kun kulang ang mga rekisitos.
Suno pa kay Andrade nga wala man sila sang gina-refer nga tawo nga kadtuan sang mga franchise holders para masuguran ang pagproseso sang ila mga dokumento.
Ginhangkat man sini ang sin-o ang yara sa nagalapta nga alegasyon nga magpadulong lamang sa ila talatapan kag itudlo ang empleyado sang TFRU agud gilayon sini nga maaksyunan ang isyu.
Samtang nagapati si Andrade nga may mga tawo nga yara sa likod sang mga akusasyon nga ginbuy-an batuk sa talatapan.
