Maga-invest ang PhilCo Food Processing, Inc., isa ka unit sang Thai World Group of Companies sang masobra P1 billion sa sulod sang Phividec Industrial Estate sa Tagoloan, Misamis Oriental, suno sa Philippine Economic Zone Authority (PEZA).
Ginpahayag sang PEZA nga ginrehistro na sang investment promotion agency ang proyekto sang PhilCo para sa isa ka coconut processing facility.
Dugang pa sini, target sang kompanya nga suguran ang konstruksiyon sa Oktubre subong nga tuig, kun sa diin ang commercial operations magasugod sa tunga sang December 2025 kag January 2026.
Suno sa PEZA, ang produksyon sang pabrika ang i-export sa Thailand, Europe, kag United States.
Una na nga gin-report sang Philippine Information Agency nga nagpirma sanday Phividec Industrial Authority Administrator and Chief Executive Officer Joseph Donato Bernedo kag PhilCo Director Buncha Punyatanakorn sa isa ka lease agreement para sa 39,596-square-meter parcel of land sa sulod sang industrial estate.
Ginalauman nga magatuga sang 2,500 trabaho, ang food processing facility kag mangin dugang nga merkado para sa coconut farmers sa northern Mindanao kag mga kalapit nga probinsya.
Ang pabrika maga-produce sang 78,000 tons sang ultra-high temperature coconut milk kada tuig kag frozen coconut meat.
