ROXAS CITY – Luyag sang tiayon ni Retired Master Sergeant Joniffer Borda nga atubangon ang mga suspetsado nga nagpatay sa iya nga bana.
Sa interview sang Bombo Radyo kay Mrs. Juvy Borda nga luyag sini nga atubangon kag usisaon ang nadakpan nga mga suspek ilabi na si Rogelio Padernal angut sa natabo nga insidente.
Ginkumpirmar ni Juvy nga kilala sini ang suspek nga si Padernal.
Suno sa ginang nga ginpahalin si Padernal bilang guwardiya bangud masami na lamang ini nadadakpan nga nagakatulog.
Apang, sa kaluoy sang bana, ginhimo ini bilang reliever security guard agud indi madulaan sang trabaho.
Gin-athag sini nga ang kumpaniya mismo ang nagpahalin kay Padernal kag indi ang napatay nga biktima.
Ginpahaygaman sini nga masami nagapadulong sa ila balay si Padernal agud maghulam sang kuwarta.
Samtang, luyag naman ni Juvy nga maaresto tanan ang mga suspek agud mahatagan sang hustisya ang kamatayon sang iya bana.
