CUARTERO, CAPIZ- Pilason ang isa ka tiyo matapos nga nabun-an sang kaugalingon nga gumangkon sa Sitio Hacienda, Barangay Bito-on Ilawod, Cuartero, Capiz.
Ang biktima amo si alyas ‘Dodong’, 29-anyos, samtang ang duha ka mga suspetsado amo ang mag-utod nga sanday alyas ‘Chris’, 21-anyos kag alyas ‘Toper’, 19-anyos nga lunsay mga residente sang nasambit nga lugar.
Sa interview sang Bombo Radyo kay Police Captain Jesse Lepaña, Officer-In-Charge sang Cuartero Municipal Police Station, iya ginpahayag nga takna las 12:05 sang kaagahon sang Disyembre 22 natabo ang amo nga insidente.
Suno kay Lepaña, masakay na kuntani sa motorsiklo ang mag-utod agud nga magpauli halin sa isa ka party apang ginpalapitan ini sang ila nga Tiyo. Ginaalegar may nagluntad nga indi pag-intindihanay sa magkatuhay nga bahin rason nga natapungulan si alyas ‘Toper’ nga gin-apinan naman ni alyas ‘Chris’ kag nakig-away sa ila nga tiyo, apang kaangay nga pyerde si alyas ‘Chris’ rason nga naggabot sang kutsilyo si alyas ‘Toper’ kag ginbuno ang ila nga tiyo.
Bangud sa hitabo, nag-angkon sang pilas sa likod ang ila nga Tiyo nga gilayon naman nga ginpadangat sa Dao District Hospital para sa nagakaigo nga pagbulong.
Nahibaluan nga bangud sa kahulugbon, nagluntad ang amo nga insidente.
Sa subong, nagapabilin sa kustodiya sang Cuartero Municipal Police Station ang mag-utod nga mga suspetsado para sa nagakaigo nga disposisyon.
Interviewed by Bombo Sunnie Mae Constantino Batencila
