Arestado ang isa ka mangunguma matapos ginserbihan sang warrant of arrest sa ginapahayag kaso nga Qualified Rape sa Barangay Caidquid, Mambusao, Capiz.
Ang arestado amo si alyas “Nonoy”, legal ang edad, kag residente sang amo nga lugar.
Sa interview sang Bombo Radyo kay Police Major Ruby Magallanes, Officer in-charge sang Mambusao Municipal Police Station, iya ginpahayag nga ang arestado ang ginakabig nga top 4 most wanted person sa Capiz kag top 2 most wanted person in Municipal Level.
Suno kay Magallanes, ang warrant nga ginserbe sa arestado ang gin-isue ni Judge Judith D. Orendain-Tonogbanua, sang Regional Trial Court, 6th Judicial Region, Branch 20, Mambusao, Capiz.
Sa subong, yara na sa Mambusao Municipal Police Station ang arestado para sa nagakaigo nga disposisyon.
