TEHRAN, IRAN / TEL AVIV, ISRAEL- Napatay ang isa sa pinakamataas nga opisyal sang militar sang Iran nga si Ali Shadmani matapos ang ginpatigayon nga airstrike sang Israel sa syudad sang Tehran sang kaagahon sang Martes.
Suno sa opisyal nga pahayag sang Israeli military, si Shadmani ginbomba sa sulod sang isa ka military command center sa Tehran.
Si Shadmani kilala nga isa sa mga kasaligan kag kasandigan ni Supreme Leader Ayatollah Ali Khamenei, kag amo ang nagapanguna sa Islamic Revolutionary Guard Corps (IRGC) kag sa kabug-usan nga pwersa militar sang Iran.
Dugang diri, ang nasambit nga airstrike kabahin sang nagapadayon nga tensyon sa tunga sang Israel kag Iran, nga nagsugod sang Huwebes bangud sang asud-asod nga atake. May mga report man nga indi lang mga military facilities ang apektado kundi may mga sibilyan man nga nadalahig sa magtimbang nga bahin.
Nahibaluan nga wala pa sang opisyal nga pahayag ang gobyerno sang Iran parte sa kamatayon ni Shadmani, apang ginalauman ang mas mabaskog nga balos halin sa Tehran sa masunod nga mga adlaw.
Ginakahadlukan nga ini nga insidente magadugang pa sa kainit sang sitwasyon sa tunga sang Middle East, kag posible makaapekto sa seguridad sang mga pungsod sa palibot.
