ROXAS CITY – Patay ang isa ka traffic auxiliary matapos ginluthang sa Barangay Dinginan.
Ginkilala ang biktima nga si Jun Jun Barredo 31-anyos sang amo nga barangay nga nag-angkon sang pilas sa ulo matapos gintiro ni Juvy Pulao.
Ginpahayag ni Mrs. Cynthia Barredo, iloy sang biktima nga nakabati ini sang lupok sang armas kagab-i kag sa iya pagtsekyar nakita sini ang anak nga nagapaligo na sa kaugalingon nga dugo.
Suno sa ginang nga nasaksihan pa sang iya umagad, asawa sang biktima ang krimen sa diin ginaalegar nga ginhambalan pa ini sang utod sang suspek nga indi magsugid nga sila ang nagluthang kay Pulao.
Ginapanindugan sang ginang nga intensyon ang pagpatay sa iya anak bangud ginbantayan sang suspek ang biktima nga nagpauli na sakay sa iya motorsiklo kag ginluthang.
Nagapati ang pamilya sang biktima nga daan nga hiligut-anon ang motibo sa krimen.
Nagpanawagan man ang iloy sang traffic auxiliary sa suspek nga magsungka na lamang kag atubangon ang ginhimo nga krimen.
